قال الإعلامي المصري محمود سعد، ردا على التعليقات حول كتابة منشور على صفحته في قصة أبناء محمود عبد العزيز والإعلامية بوسي شلبي وعدم الاتصال بهم: "هو انا ما عنديش تليفون لا محمد ولا كريم ده اول حاجة.. بس طبعا كان ممكن اجيبه.. لكن.. لما بدأت القصة تابعتها زي حضراتكم.. وانا ماعنديش معلومات اكتر من اللي قاله الناس.".

وأضاف سعد، عبر حسابه الرسمي على منصة "فيس بوك": "الكلام مش لطيف.. والتفاصيل دمها تقيل.. الحقيقة اني قلت يعني انا مش عايز ابقى بضغط عليهم.. انا بحبهم من وهما صغيرين وهما دلوقتي كبروا وبقوا نجوم وشخصيات كبيرة يقدروا ياخدوا قراراتهم بنفسهم مية في المية.. وانا ماحبش ابقى وصي على حد.. فلقيت أنه الأسلم أن أنا أكتب كلمتين. هم شافوهم ماشافوهمش مش مشكلة."

وتابع: "في حاجة بتعملها أحيانا مش بتريحك قوي لكن بتحل مشكلة قابلتك.. انا قابلتني مشكلة ان في تجريح كده وكلام على محمود عبد العزيز واحنا متفقين كلنا كده انا وأحمد ومحمود والمجموعة دي ان احنا ندافع عن بعض.. قلت أكتب كلمتين.. الكلمتين دول انا حاسسهم بجد انه يا جماعة لموا الحكاية دي.. مش عايزين شوشرة.. كتبت كلمتين هم يعملوا بيها او ما يعملوش هم مش ملزمين قدامي في حاجة."

وأوضح محمود سعد: "لو اتكلمت في التليفون يبقى انا ألزمتهم بأنه اللي انا بقوله ده يصح أنهم يعملوه.. لا ماقدرش ألزمهم ولا أحب أن أنا ألزمهم.. ففوجئت تاني يوم بان محمد بيدور عليا وجاب تليفوني وكلمني وقعدنا نتكلم كتير.. شكرته على أنه اهتم وهو شكرني على أني اهتميت وكانت مكالمة كويسة.. بس ادي كل الحكاية."

 وختم: "فانا مش حابب أورطهم خالص.. ولا حابب أدخل في القصة دي لأن أدخل فيه أعمل إيه.. ده خلاف بين الناس على شيء ما. يعني انا عرفت جزء منه لكن الباقي ما عرفتوش.. فانا ما اتدخلش..  في حد قاللي قول رأيك بصراحة اقول رأيي في ايه؟ سيدة كانت مرتبطة بمحمود عبد العزيز وفي مشكلة بينها وبين ولاده وولاده.. انا اقول رأيي في ايه؟ انا بس اقول يا جماعة لموا الموضوع بلاش شوشرة.. يا جماعة تصافوا مع بعض.. يا جماعة روحوا المحكمة من غير ما تكتبوا في السوشيال ميديا.. فحتى محمد قال لي انا ما عملتش حاجة خالص. غير لما طلع الكلام من الجهة التانية رحت مطلع بيان انا وكريم وما اتكلمتش خالص.. بس ادي كل الحكاية".