أنا متابعة جيدة لمواقع التواصل الاجتماعى وتحديداً الإنستجرام والفيس بوك وتستهوينى قراءة البوستات المختلفة لشخصيات بعينها، ومن خلال المكتوب أستشعر درجة ثقافة وإلمام وحكمة كاتبها، بعضها يكون منقولا والبعض الآخر من وحى صاحب الأكونت، وبالطبع ليس كل ما يكتب يستحق أن يقرأ، الجدير فقط بالمتابعة هو الذى يفوز بالاهتمام ومن بين البوستات المطروحة لفت نظرى بوست كتبته النجمة سيمون وهى من مدة تشارك جمهورها بمجموعة منتقاة من الخواطر الإنسانية والحق يقال سيمون لم تصل فقط إلى مرحلة النضج الفنى بل هناك صرح من النضج الإنسانى تسكنه بعد فترات ليست بقليلة من التأمل والانفراد بالذات، وهذا يحسب لها، كما أرى أن المتابعين لها يتفاعلون معها فى كل ما تسطره وكأنهم ينتظرون أقوالها المأثورة وتأملاتها الفلسفية عن أحوال الحياة وملامح البشر النفسية. وهذا البوست تحديداً أنقله إليكم لأنه يحمل معانى ومضامين مختلفة تؤكد ن مش كل ولاد الناس ولاد أصول.

■ ولاد الأصول عمرهم ما ينكروا فضل حد عليهم بعد فضل ربنا.

■ ولاد الأصول باقيين على العشرة لحد آخر لحظة وبيعملوا كل اللى عليهم وزيادة عشان يحافظوا عليها.

■ ولاد الأصول لا يمكن يردوا الأذى بالأذى.

■ ولاد الأصول بيساعدوا وقت الشدة إذا احتاجتهم لازم هتلاقيهم ويمكن من غير ما تطلب وجودهم.

■ ولاد الأصول بيساعدوا الكل من غير أى مصلحة تعود عليهم.

■ ولاد الأصول كرامتهم عندهم رقم ١ ومستحيل يقبلوا أى إهانة أو تجريح ونفسهم عزيزة فوق الخيال.

■ ولاد الأصول بيعرفوا يعتذروا إذا غلطوا والغلط ما بيتكررش.

■ ولاد الأصول كلمتهم واحدة، لو وعدوا يوفوا.

■ ولاد الأصول اللى بيحركهم ضميرهم واستقامتهم.

■ ولاد الأصول صحاب أصحابهم ومستحيل يتخلوا عنهم.

■ ولاد الأصول جدعان بالفطرة والطيبة ملازماهم.

■ ولاد الأصول بيعاتبوا مرة واتنين وتلاتة عشان مش من طبعهم يفرطوا فى حد بسهولة لكن إذا قرروا التفريط لا يمكن تقدر ترجعهم تانى.

■ ولاد الأصول ملهمش فى الحوارات الجانبية، اللى عايزين يقولوه بيتقال فى الوش من غير لف ودوران.

■ ولاد الأصول لو اتظلموا عمرهم ما يظلموا وبينتظروا ربنا يجيب لهم حقهم.

■ ولاد الأصول يصفوا بسرعة إذا كان اللى قدامهم شارى وينسوا بسرعة إذا كان اللى قدامهم بايع.

■ ولاد الأصول بيحبوا الخير للغير حتى لو مش هيطولوا من الخير ده حاجة ويفرحوا من قلبهم للجميع.

■ ولاد الأصول عينهم شبعانة ولا يمكن يبصوا فى رزق غيرهم ولا يتدخلوا فى شؤون الغير.

■ ولاد الأصول بيقدروا وبيحترموا أقل حاجة حلوة تعملها معاهم.

■ ولاد الأصول ما يعرفوش يخونوا أو يجرحوا أو يستغلوا فرص ولا كدابين ولا غدارين ولا نمامين.

■ ولاد الأصول ما يفوتهمش واجب ولا يقصروا فى حق ولا يتأخروا عن التزام.

■ ولاد الأصول طبعهم الكرم وأخلاقهم عالية، يفكروا فيك قبل ما يفكروا فى نفسهم.

■ ولاد الأصول مهما كانوا ناجحين أو أغنياء دايماً التواضع سمة أساسية فى تركيبتهم.

■ ولاد الأصول مستحيل يعايروك باللى عملوه معاك من مواقف، إنت لوحدك هتعرف الفرق بينهم وبين غيرهم.

■ ولاد الأصول جواهم رحمة وعدل ودايماً بيحطوا نفسهم مكان غيرهم عشان يعملوا الصح.

■ ولاد الأصول مش هما المشهورين أو اللى بيلبسوا ماركات ولا اللى معاهم فلوس ولا اللى راكبين عربيات آخر موديل ولا اللى ساكنين فى أحلى وأشيك الأماكن ولا اللى بيتكلموا لغات وليهم مناصب ومقامات.

■ ولاد الأصول بالتصرفات والأفعال المحترمة والأفكار البناءة والضمير الحى والأخلاق المتصانة... اللى بيعرفوا يعملوا الأصول ومش كل ولاد الناس ولاد أصول.