شارك الإعلامي المصري أحمد يونس متابعيه على حسابه الخاص على موقع تبادل الصور والفيديوهات انستجرام  بصورة لصديقه الفنان والمذيع أكرم حسني، معترفًا فيها بفضله عليه ، واعترافه بأنه صاحب فكرة اسم برنامجه الشهير "عالقهوة".

وجاء نص ما نشره كالآتي: "أكرم الكل عارفه كموهبة مالهاش حل عنده طلة كده مجرد ما تشوفه تبتسم تلقائي، لكن ع المستوى الانساني: أجدع وأرجل صاحب، عمره ما بخل عليا بنصيحه،  دايمًا اقرفه واسأله لما بيجيلي شغل لإني عارف إن الرد نصيحه بمنتهى الإخلاص.. أكرم أوافق ولا لا؟ أكرم اقولهم عاوز كام؟ عمر شهرته ما غيرته. مر بظروف وازمات كتير جدًا لكن علطول مثابر جدًا، خفة دمه قدام الكاميرا نسخة طبق الأصل من خفة دمه في الحقيقة، بيتكسف لو حد شكر فيه بشكل يخليك انت نفسك تضحك. فترة شغلي معاه من أجمل الفترات، لما بتطلب معاه يسف على اي حد من صحابه اقسم بالله لو هتعيط مش هيبطل لو جالك جلطه حتى. دماغه شغاله وافكاره برا الصندوق دايمًا ادى فرص لناس كتير جدًا، ما عندوش تناكة اني انا بقيت نجم النجوم ولازم انتو اللي تيجوا وتسلموا والحركات دي انا ببقا واقف والاقي جاي من ورايا بكل بساطة وتواضع ولاد الناس الحقيقين يسلم. في فترة مشاكل شغلي القديم تدخل برغم مشاغله لإنه مش عاوز طرفين يخسروا بعض. أكرم حسني هو صاحب فكرة اسم برنامج عالقهوة اللي بعتبره هو نقطة التحول الكبرى في شغلي في الإعلام. الكلام ده حقه اني اقوله عنه ودي مش أول ولا اخر مره هقوله لأنه صاحب وراجل محترم وابن اصول بجد وانا اتعلمت ان العرفان بالجميل سمة ولاد الاصل، ونكران الجميل سمة معدومي الاصل، ربنا يعليك يا حبيبي اكتر واكتر".

ويذكر أن محطة الراديو Nogoum FM، قد جمعت كلا النجمين في عملهم كمذيعين، وحتى ترك أحمد يونس للمحطة، إثر أزمة كان سببها رغبة يونس في افتتاح مقهى يحمل نفس إسم البرنامج "عالقهوة"، وذلك ما رفضته المحطة بشكل قاطع، مما أدى لتوقف البرنامج، وكان ذلك عام 2015، ومن بعدها انتقل يونس لمحطة الراديو 9090.